Mjeku Kita Sallabanda thotë se tashmë jemi para valës së 4 të Covid, e disa vende para valës së pestë.
“Të presim atë që quhet vala e 4 ose e 5 në disa vende, sepse kemi një përhapje të sëmundshmërisë nga ata njerëz që nuk janë vaksinuar. Mosvaksinimi i popullatës në të gjithë botën bën që të kemi variante të COVID 19”, tha mjeku.
Duke patur parasysh variantin Delta që tashmë është përhapur në të gjithë botën dhe që ka një infektueshmëri më të lartë, neurokirugu tha se megjithatë ky variant nuk shënon më shumë fatalitete.
“Rritja e numrit të të infektuarve nuk është shoqëruar me rritjen e fataliteteve sepse po infektohen moshat e reja dhe ata e përballojnë më mirë”, tha Sallabanda.
Duke ju referuar përvojës së Spanjës ku ai ushtron profesionin, mjeku pohoi se vetëm 5.7% e personave të infektuar janë vaksinuar me të dyja dozat.
“83% e të shtruarve nuk e kanë bërë vaksinën, 11% kanë bërë një dozë dhe vetëm 5.7% janë ata që kanë bërë dy doza. Dmth në 95% të rasteve vaksinimi na mbron jo vetëm nga infeksioni, por edhe nga gjendja e rëndë”, u shpreh ai./Opinion.al
