Deputeti i PD, Ervin Salianji në një prononcim për mediat është shprehur se nuk ka bërë asnjë krim, por një denoncim. Ai foli për mediat pas shtyrjes së seancës gjyqësore të Apelit për çështjen “Babale” dhe tha se kjo nuk ka qenë një betejë personale, por një betejë e opozitës.
Sipas Salianjit, denoncimi ku ishte i përfshirë vëllai i Fatmir Xhafës, duhet të ishte bërë më parë nga drejtuesit e PD në atë kohë, duke iu referuar Bashës, por tha se këtë çështje do ta sqaronte në një moment tjetër.
“Nuk kam bërë krim, por kam bërë denoncim. Kam bërë shumë denoncime dhe do vazhdoj të bëj. Kam denoncuar edhe arat me kanabis, që janë faktuar si të vërteta. Kjo nuk ka qenë një betejë personale, por një betejë e opozitës. Denoncimi i kësaj afere duhej bërë në një kohë të mëparshme, por do të kemi kohë ta sqaroj edhe këtë. Unë nuk përjashtoj njeri, por edhe nuk ftoj njeri. Kanë qenë në seancën e shkallës së parë, ka pasur qëndrime edhe në këtë rast. Unë kam detyrime politike për pozicionin që kam. Nuk ka ndonjë ndryshim nga ish drejtuesit e PD, por për rastin në fjalë, edhe nëse ka ndryshim qëndrimi unë këtu jam dhe do flas me fakte dhe prova në çdo rast”,-tha deputeti.
