Ish-deputeti i Partisë Demokratike, Ervin Salianji, është shprehur se ish-kryeprokurorja e Krimeve të Rënda, Donika Prela, u shkarkua sot pasi u përdor nga qeveria.
Sipas tij, Donika Prela ka shpëtuar kriminelë dhe trafikanë për llogari të qeverisë dhe për të sulmuar opozitën.
Në statusin e tij në Facebook, Salianji shkruan se prokurorët dhe gjyqtarët pa interitet dhe me probleme me ligjin janë përdorur nga qeveria për të mbrojtur korrupsionin.
“Prelën e flakën si shumë të përdorur! Çdo prokuror apo gjyqtar pa integritet profesional dhe me probleme të theksuara me ligjin dhe shperdorimin e detyrës duke akumuluar pasuri të paligjshme, është përdorur rëndshëm nga qeveria për të mbrojtur korrupsionin galopant, për të shpëtuar nga ndeshkimi politikanë dhe kriminelë që i shërbejnë qeverisë! Shpetoi kriminelë dhe trafikantë, e përdorën për të shpëtuar llumin dhe sulmuan opozitën, duke i shërbyer llumit u bë aq pis sa tani nuk i duhej as dreqit! Drejtësia vonon por nuk harron, po ju vjen dita!”, shkruan Ervin Salianji.
Kolegji i Posaçëm i Apelimit ka shkarkuar sot nga detyra ish-drejtuesen e Prokurorisë së Krimeve të Rënda, Donika Prela.
Trupa gjykuese e KPA tha se Prela nuk justifikon dhe ka fshehur pasurinë, si dhe ka kryer deklarim të pasaktë. Kujtojmë se Prela u konfirmua në detyrë në shkurt 2019 nga Komisioni i Pavarur i Kualifikimit, pavarësisht problematikave të shumta dhe akuzave.
Vendimi u ankimua nga Komisioneri Publik, çka solli edhe shkarkimin nga KPA. /Opinion.al
