Deputeti i Partisë Demokratike, Ervin Salianji, gjatë raportimit të shifrave nga drejtori i Përgjithshëm i Policisë së Shtetit, në Komisionin e Sigurisë Kombëtare, i ka drejtuar disa pyetje këtij të fundit.
Gjatë pyetjeve të drejtuara Gledis Nanos, Salianji është ndaluar edhe në Operacionin Forca e Ligjit (OFL) , ku pyeti nëse kjo strukturë vazhdon edhe pas 25 prillit.
Ai gjithashtu vuri theksin se për familjarë të drejtuesve të Partisë Socialiste, për ish-ministra apo deputetë, nuk ka pasur njoftim për hetim pasuror nga vajza me syze, zëdhënësja e OFL.
“Asetet e konfiskuar rreth 31 mln euro, ndërkohë që ka pasur një operacion OFL që tanimë më është pezulluar. Në informacionet zyrtare që kam kërkuar është pothuajse gjysmë për gjysmë çuarja në SPAK e subjekteve të këtij operacioni. Këta gjysma që kanë mbetur, janë ndaluar për shkak se mbaruan zgjedhjet, ka pasur ky operacion lidhje me zgjedhjet e 25 prillit? Nga ana tjetër për persona të cilët njihen si persona të afërt, familjarë të drejtuesve të PS, ish-ministra apo deputetë, nuk ka pasur njoftim të asaj vajzës me syze për hetim pasuror. Në dijeninë tuaj në sa raste SPAK ka pasur konfiskim të pasurisë nga referimi që është bërë nga policia dhe a është në vazhdim ky operacion apo është stopuar deri në datën 25 prill”,-tha Salianji.
Kujtojmë se prej disa muajsh OFL nuk funksionon më si strukturë, pasi afati i saj 1-vjeçar përfundoji dhe nuk u pa e arsyeshme të vazhdonte më tej./Opinion.al
