Ish-deputeti i Partisë Demokratike, Ervin Salianji është takuar ditën e sotme me disa fermerë në Lushnjë. Salianji është shprehur se qeveria i ka braktisur fermerët në kohën më të vështirë për ta, siç është situata e krijuar nga pandemia COVID-19.
Ish-deputeti tha se bujqësia është sektori që nuk ka marrë asnjë qindarkë ndihmë nga qeveria, megjithëse, sipas tij, në regjistrat e shtetit llogariten si të punësuar rreth 461 mijë persona. Gjatë bashkëbisedimit, fermerët thanë se ishin me kredi dhe ishin zhytur akoma më keq në borxhe këto dy muaj.
Ndërkohë, Salianji është shprehur; “Qeveria nuk flet për sektorin bujqësor. Bujqësia është në gjendje të mjerueshme në të gjithë vendin. Ne kërkojmë që të kthehet vëmendja tek fermerët dhe sektori bujqësor, që është një nga pjesët më të rëndësishme të ekonomisë së vendit. Ekonominë e kontrollojnë 2-3 oligarkë. U jep naftën, edhe portet, ndërtimin, shpërndarjen, magazinimin. Shqipëria punon për 10 vetë, ndërkohë që 3 milionë të tjerë vuajnë. Në çdo sektor thonë që Rama është bërë më keq se virusi. Ata tremben më shumë nga katastrofa Rama, sesa nga virusi i koronës.”
Fermerët u shprehën; “Nafta është shumë e shtrenjtë dhe e paguajmë njësoj si karburantin e makinës së Edi Ramës. Qeveria nuk ka na ka fare në listë. Nuk na ka as për gjë, rrojmë apo nuk rrojmë. Nuk marrin subvencion. Ka nxjerrë policët, ka bllokuar tregjet që fermerët të mos dalin e të shesin./ Opinion.al
