Ervin Salianji, i cili është marrë i pandehur nga Prokuroria për publikimet e përgjimeve të dosjes “Xhafaj-Babale” nga selia e PD-së këtë të shtunë ka nxjerrë sërish përgjimet, që sipas tij janë zyrtare , ku tregohet një komunikim mes Fredi Alizotit dhe Drejtorit të Policisë së Fierit, Albert Nushi.
Fredi Alizoti është personi që ka luajtur rolin e vëllait të ish-Ministrit të Brendshëm Fatmir Xhafaj, sipas organit të akuzës. Sipas përgjimeve që ka publikuar Salianji, Fredi Alizoti i ankohet Drejtorit të Policisë së Fierit se e kanë lënë në baltë, ndërsa ky i fundit i premton në fund se do t’i nisë një sasi lekësh.
Por këtë të shtunë, Salianji tha se Fredi Alizoti ka folur dhe me Taulant Ballën përpara se të fliste me zyrtarin e policisë.
Opinion.al u mundua të marrë një deklaratë nga Prokuroria e Përgjithshme për këto akuza por reagimi ishte: Nuk mund të bëjmë një koment për këtë çështje, pasi e ka në dorë Prokuroria e Krimeve të Rënda./Opinion.al
