Ish-deputeti i Partisë Demokratike Ervin Salianji është paraqitur sot tek Komisioni i Pavarur i Kualifikimit për të dorëzuar një material inkriminues për integritetin e Prokurorit te Krimeve te Renda Gent Osmani, për te cilin nesër KPA merr vendimin final për vetingun.
Ervin Salianji në një deklarate për mediat tha se kishte dorëzuar një CD në të cilën sipas tij është një bisedë e regjistruar midis prokurorit Osmani dhe Alfred Alizotit.
“Sa dorëzova një CD me materiale përgjuese të bëra me vendim gjykate nga ana e prokurorisë në të cilën një anëtar i Këshillit të Lartë të Prokurorisë ka komunikuar në mënyrë jo vetëm miqësore, por edhe duke prishur edhe fshirë një pjesë të përgjimit siç duket edhe në përgjimin që do ta bëj publik edhe për mediat, një komunikim me shtetasin Alfred Alizoti.
E ka vënë vetë në përgjim e më pas ka komunikuar po vetë pa mbajtur asnjë lloj procesverbali, pa pasur asnjë lloj dokumentimi gjatë komunikimit me të dhe duket që është vendosur në mënyrë jo profesionale në shërbim të politikës dhe padiskutim të ish-ministrit Xhafaj, i cili e ka presionuar për ta mbajtur në Kolegjin e Apelimit
Kam pritur që prokuroria dhe Gjykata ta cojnë vetë pranë institucioneve të vetingut
Rikujtoj që prokurori Osmani nuk është një prokuror i shortuar, por është vënë me urdhër të kryetares së Prokurorisë së Krimeve të Rënda, pra është i vendosur dhe tani shihet se për cilat arsye. Për të prishur një dosje të trafikut të drogës dhe për ta kaluar atë në një kallëzim të rremë” tha ndër të tjera Salianji.
Prokurori Gent Osmani, u konfirmua në detyrë nga KPK por pas vendimi u apelua nga Komisioneri Publik. Tashmë do të vendosë Kolegji i Posaçëm i Apelimit për lënien ose jo në fuqi të vendimit të KPK për prokurorin Osmani. /Opinion.al
