Kryetari i Partisë Demokratike, Sali Berisha ka reaguar paraditen e sotme lidhur me largimin e komandantit të Gardës së Republikës, Ermal Onuzi, 4 ditë më parë.
Në konferencën për shtyp nga selia blu, Berisha e konsideron këtë largim si shkarkim dhe jo si dorëheqje.
Kryedemokrati tha se komandanti i Gardës u shkarkua për shkak se në media rrodhi lajmi i shtrimit në spital të kryeministrit Edi Rama, e që sipas Berishës, Ermal Onuzi nuk kishte bllokuar daljen e këtij lajmi.
Po ashtu, Berisha u ndal te vetëvrasja e gardianit.
“Doli lajmi i shtrimit të tij urgjent në spital, se sipas Edi Ramës, Onuzi duhet t’ja qepte gojën gjithë personelit dhe ky ishte fajtori. Dhe unë denoncoj heshtjen e mediave, sidomos me vetëvrasjen që ndodhi fill mbrapa të ushtarit të Gardës. Një ushtar profesionist, u gjet i vrarë në makinë.
E paraqitën se ky vrau veten në makinë. Edhe për Mehmet Shehun thanë që vrau veten në dhomë të gjumit. Nuk kam të dhëna, i shpreh ngushëllime familjes së të ndjerit, por i bëj thirrje Avokatit të Popullit, dhe ju garantoj që opozita do ta hetojë, sepse kjo ndodhi fill pas shkarkimit brutal të komandantit të Gardës për shkak të daljes së lajmit se Edi Rama shkoi në spital dhe bëri një goditje, nuk e di se çfarë kishte”, u shpreh Sali Berisha.
