Gjatë paradites së sotme në Durrës ka patur një kaos me shpërndarjen e ndihmave pasi shumë banorë ankohen se nuk kanë marrë asgjë përveç një panineje dhe një shisheje uji.
Edhe pse Bashkia e Durrësit ka lëshuar autorizim për banorët që të marrin ndihma në gjimnazin “Leonik Tomeo”, sipas qytetarëve ky vërtetim nuk iu ka shërbyer aspak pasi ka pasur keqmenaxhim të ndihmave.
Ndërkaq kryetarja e Bashkisë, Valbona Sako ka mohuar që të ketë pasur keqmenxhim të situatës, teksa thotë që kaosi që është krijuar në këto qëndra vjen për shkak të personave që nuk kanë nevoja dhe abuzojnë.
“Kaosi shkaktohet nga persona që nuk kanë nevojë, ndihmat shpërndahen në mënyrë të organizuar. I bëj thirrje qytetarëve të Durrësit të jenë të qetë. Punonjësit janë në terren për të evidentuar qytetarët të cilët kanë nevojë, 30 grupe i kemi të shpërndarë në terren.”, tha Valbona Sako.
E pyetur nga gazetarja e ABC News, çfarë duhet të bëjë një qytetar që i është shpallur shtëpia e pabanueshme ndërkohë që nuk është sistemuar në asnjë nga fjetoret e vëna në dispozicion nga institucionet, Sako tha:
“Kur thua që nuk janë sistemuar do të thotë që zotëria nuk ka pasur nevojë për tu sistemuar. Sot kemi evidentimin e saktë të pjesës së qytetarëve, që realisht nuk kanë ku të banojnë. Akomodimi është i organizuar dhe i siguruar për të gjithë. Qytetari paraqitet në Bashkinë e Durrësit, krijojmë një lëvizje të organizuar me transport dhe i çojmë në pikat e akomodimit, që janë hotelet me kushtet më të mira. Do të thoja janë hotele me pesë yje, që në kushte normale zotërinjtë nuk do të mund ti paguanin për pushime.”/Opinion.al
