Kryeministri Edi Rama, ka ftuar në puntatën e radhës të podcast-eve të tij kryebashkiaken aktuale të bashkisë Durrës Emiriana Sako, e cila garon në 14 Maj për një tjetër mandat.
Sako ka rrëfyer per momentet e para kur ka marrë detyrën si dhe momentet kur ka qenë në vështirësi.
“Ka pasur momente që kam qenë në vështirësi sepse situata kur unë fillova detyrën ishe më e vështirë sesa e kisha menduar, por ajo që i kam thënë vetës është “Ani bëj punën sepse çdo gjë do gjejë vendin e vet”. Kështu që, për mua, veriu i drejtimit është vetëm puna. Kjo pastaj është, pra duke bërë punën, ke mbështetjen e njerëzve,” thotë Sako duke shtuar se nuk ka pasur ambicie për të qenë kryetare bashkie.
Ndërkohë, Sako ka zbuluar bisedën e parë me kreun e qeverisë.
“Po. S’besoj se do e harroj ndonjëherë. Fjalia me të cilën ne jemi takuar, kemi qenë në një mbledhje zoom sepse në kohën kur unë mora detyrën e këshillit bashkiak nuk ishte e mundur që të bënim aktivitete në terren prej pandemisë, pra dy sfida të mbivendosura tërmeti dhe pandemia dhe fjalia që ju më keni thënë është: “merr një krevat dhe fli në bashki tani”, që ishte për një person që sapo kishte marrë një detyrë, çfarë detyre në një moment shumë të vështirë të qytetit të Durrësit, ku përveç tërmetit ishte dhe pandemia. Nuk ishim takuar asnjëherë më parë. Unë nuk kisha patur mundësi që të takohesha me ju më herët. Ndodhi në këtë mënyrë”, tha Sako.
