Presidenti i Kukësit Safet Gjici ka njoftuar nëpërmjet një konference për shtyp se trajneri Armando Cungu nuk do të largohet nga drejtimi i klubit.
Duke kundërshtuar zërat që u përhapën për një largim të mundshëm të trajnerit, Gjici tha se ditën pas ndeshjes Armando Cungu ka qenë pushim si zakonisht.
“Trajneri ka qenë pushim ditën pas ndeshjes, ka qenë në Shkodër si zakonisht. Tani vijon punën, nuk ka pasur asnjë vendim për ta larguar. Ka besimin tim absolut, sepse loja nuk ka qenë e keqe, përtej rezultateve. Loja po përmirësohet nga ndeshja në ndeshje. E patë vetë në Durrës që luajtëm shumë mirë, mund të na jepej një penallti, ashtu si për Teutën. Ndoshta edhe arbitri e humbi qetësinë. Klubi nuk ka marrë asnjë vendim për trajnerin, përndryshe do ta kishim zyrtarizuar ne, si klub, jo mediat. Unë i marr vendimet pa ndikimin e askujt dhe nuk pushohet trajneri nga mediat. Kam biseduar sot me trajnerin dhe lojtarët, sepse edhe ata kanë përgjegjësi”, tha Safet Gjici.
