Mbrëmjen e së hënës u mbyll merkatoja e verës për futbollin europian. Ashtu siç pritej, dita e fundit do të ishte tepër e ngjeshur me lëvizjet e lojtarëve të cilët kishin rezistuar deri në orët e fundit. Më e bujshmja ishte ajo e sulmuesit të Interit, Mauro Icardi i cili u transferua në formë huazimi te PSG.
Megjithatë orët e fundit të merkatos kanë parë edhe dy futbollistë me origjinë shqiptare të bëjnë lëvizjet e tyre. Armando Sadiku është transferuar te Malaga në Spanjë. Ai është huazuar nga Levante por pa të drejtë blerjeje. Malaga në orët e fundit të merkatos afroi 3 futbollistë: Sadiku, Benkhemassa dhe Lorenzo González. Sipas gazetës “AS”, të tre këta futbollistë do të marrin pagën minimale të vendosur nga liga spanjolle, që është 80 000 euro.
Portieri i Kosovës, Samir Ujkani është rikthyer në Serie A pas aventurës së tij në Turqi me Riezispor. Ujkani është transferuar te Torino ku pritet të jetë zëvendësuesi i Sirigu.
Ujkani ka luajtur më parë në Itali me skuadra si Palermo, Novara apo dhe Xhenoa. /Opinion.al
