Pas krizës në të cilën është përfshirë prej disa muajsh politika shqiptare, presidenti Ilir Meta, ka deklaruar se është i gatshëm që të dekretoj një tjetër datë për zgjedhjet lokale në të cilën do mund të marrë pjesë dhe opozita.
Kjo deklaratë nuk është mirëpritur nga ana e kryeministri Edi Rama, i cili është shprehur i vendosur që zgjedhjet lokale të zhvillohen më 30 qershor me apo pa opozitën.
“Shumica qeverisëse nuk ka asnjë pëlqim lidhur më asnjë diskutim për shtyrjen e datës së zgjedhjeve”, shprehej Edi Rama.
Ndërkohë, ekspertët zgjedhor, Kristaq Kume dhe Afrim Krasniqi, ndajnë mendime të ndryshme për mundësinë që ka Presidenti për të firmosur një datë tjetër votimesh.
“Presidenti i Republikës, veçanërisht në kushtet kur ne nuk kemi një Gjykatë Kushtetuese, në qoftë se vlerëson se zgjedhjet e 30 qershorit janë të shmangura nga parimet dhe rregullat sipas të cilave duhet të zhvillohet një proces zgjedhor demokratik, mund të marrë iniciativën dhe të ridekretojë datën e zgjedhjeve”, shprehet Kristaq Kume, ish-kryetar i KQZ.
“Presidenti nuk ka hapësirë kushtetuese për të caktuar një datë të re. Por Presidenti në çdo rast, nëse palët politike bien dakord për një datë të re, Presidenti gati-gati është i detyruar të respektojë vullnetin politik, pavarësisht se Kushtetuta nuk është e qartë në këtë pikë”, shprehet Afrim Krasniqi, ekspert për çështjet zgjedhore.
Por, dy ekspertët mbajnë të njëjtin qëndrim përsa i përketë faktit se zgjedhjet mbahen një herë në katër vite, ashtu siç parashikohet në Kushtetut.
“Ky kufizim kushtetues mund të konsiderohet si jo pengues përballë asaj ç’ka mund të sjellë shtyrja e zgjedhjeve. Pra, realizimit të një procesi zgjedhor pas kësaj në përputhje dhe sipas kërkesave të proceseve zgjedhore që zhvillohen në shoqëritë demokratike”, thotë Kume.
Krasniqi thekson se në kuadrin ligjor përsa i përketë qeverisjes vendore, parashikohet që një kryetar bashkie largohet nga posti vetëm pasi të betohet kryetari i ri i zgjedhur.
“Automatikisht me këtë ligj është plotësuar boshllëku i periudhave kur mund të mos bëhen zgjedhjeve brenda periudhës 4 vjeçare. Nga ana tjetër, Kodi Zgjedhor parashikon se data më e fundit për të bërë zgjedhje është data 30 qershor dhe data më e afërt është 15 shtatori”
Por a ka vullnet për dialog nga politika?
“Në Shqipëri kompromisi duket shumë i largët edhe për arsye se njëri nga liderët duhet të largohet nga jeta politike. Ai që bën një hap pas në këtë rast do të duhet të marrë një faturë ose të dy një faturë”, thotë Krasniqi./ Opinion.al E.Xh.
