Presidenti i Këshillit Europian Antonio Costa është optimist për rrugëtimin jo vetëm të Shqipërisë drejt BE-së, por edhe të vendeve të tjera të rajonit.
Në konferencën e sotme me kryeministrin Edi Rama, ai theksoi se përgjatë 2 viteve të fundit ka ndryshuar edhe qasja e Bashkimit Evropian ndaj Ballkanit Perëndimor.
“Ne po jetojmë një moment të veçantë në botë sot dhe më shumë se kurrë kemi nevojë të përshpejtojmë bashkimin e Evropës. Ballkani Perëndimor na ka sjellë dhe na ka treguar edhe më parë që dëshiron të bëhet pjesë e BE-së, nuk është garë apo konkurrencë por dëshira ime është që të 6-ta vendet të ecin përpara, dhe kjo nuk ka të bëjë vetëm me të bërit të punëve për hir të të bërit të punëve, por për ndryshimin, për mendësinë, mentalitetin. Kjo nuk është e lehtë sepse edhe unë vij nga një vend që jemi bërë anëtar vetëm para 40 vitesh, por kjo është rruga e duhur për të ecur përpara.
Sot jam në Shqipëri duke plotësuar kështu vizitën time, pavarësisht problemeve dypalëshe, ndonjëherë historike. Besoni tek ne! Ne kemi një vullnet të qartë politik dhe ky është momenti i duhur për të arritur këto rezultate. E mbaj mend si para disa vitesh kur erdhëm në Tiranë dhe Rama tha “dëgjoni askush nuk ju beson më”. Sepse aq shumë herë është thënë sa tashmë askush nuk e beson, por ajo që ka ndodhur në këto vende gjatë 2 viteve të fundit, por ka ndryshuar edhe qasja në BE, edhe Rama beson tanimë në një gjë që nuk besonte dikur. Kjo gjë është e mundur!”
Më tej, rrëfeu se si një kanoçe e Coca-Cola i kujton avancimin e Shqipërisë në përmbushjen e detyrave dhe se tanimë situata duhet të ndryshojë.
“Përpiqem që edhe nëse harroj për Ballkanin Perëndimor, sa herë hyj në zyrë, shikoj një kanoçe Coca-Cola me një dizajn shumë të veçantë nga vetë Edi Rama, është simbolike sepse kur isha për vizitë në zyrën e tij para disa vitesh në cilësi tjetër, ai më ofroi një libër nga një shkrimtare shqiptare Lea Ypi, “Të lirë” në portugalisht dhe unë e lexova gjatë udhëtimit. Me të vërtetë e pëlqeva shumë atë libër, u apasionova dhe është një novelë fantastike për të kuptuar historinë tuaj dhe atë të Ballkanit Perëndimor. Kjo është arsyeja që unë atë libër ua kam ofruar si dhuratë Krishtlindjeje liderëve të Ballkanit. Shqipëria ishte aq larg të themi e veçuar nga vendet e Europës, sa herë shoh atë kanoçe në zyrën time, mendoj ky është misioni, t’i japim fund këtij izolimi!”
Ndërsa kreu i qeverisë iu përgjigj duke thënë se në fakt “asnjëherë s’e ka humbur besimin te BE”.
“Gjithmonë kam thënë se kjo është një histori dashurie që deri kur ana tjetër të ndjejë nevojë për ty, ti nuk duhe të dorëzohesh dhe duhet të jesh gati kur tjetri të hapë dritaren, pasi tjetri këndon. Tani çarçafi është hedhur”, përfundoi ai.
