Dy inspektorë të Taksave në Bashkinë e Shkodrës u arrestuan ditën e sotme, ndërsa një i tretë u shpall në kërkim, pasi akuzohen për korrupsion pasiv.
Në bashkëpunim me njëri-tjetrin tre punonjësit e Drejtorisë të të Ardhurave, kanë falsifikuar dokumente në këmbim të ryshfeteve në një hotel në plazhin Velipojë, duke mos deklaruar numrin real të dhomave të këtij hoteli me qëllim mospagimin e taksës reale që përfiton Bashkia Shkodër.
Arrestimi i tyre erdhi pas ushtrimit të kontrolleve në disa subjekte në Plazhin e Velipojës, ku u evidentuan shkeljet e bëra, ndërsa ka filluar procedimi penal në gjendje të lirë edhe për pronarin e hotelit, për veprën penale “Fshehja e të ardhurave”.
Materialet iu referuan Prokurorisë Pranë Gjykatës së Shkallës Parë Shkodër për veprat penale “Shpërdorim detyre“, “Korrupsion pasiv i personave që ushtrojnë funksione publike“, “Falsifikimi i dokumenteve“ dhe “Fshehja e të ardhurave”./Opinion.al
