Robert Mueller do të dëshmojë përpara Kongresit amerikan më 24 korrik. Këshilltari i posaçëm që mori pjesë në hetimin e ndërhyrjes së Rusisë në zgjedhjet presidenciale në SHBA, kishte kohë që ishte në negociata me ligjvënësit amerikan në lidhje me dëshminë e tij në Kongres.
Si fillim ai ishte parashikuar të dilte përpara Kongresit më 17 korrik, por sipas asaj që deklaruan kryetarët e dy Komiteteve të Dhomës së Përfaqësuesve, Muelleri do të paraqitet para Kongresit më 24 korrik “për një periudhë të gjatë kohore”.
Mueller do të dëshmojë para Komitetit të Drejtësisë dhe atij të Inteligjencës lidhur me gjetjet e hetimit të tij mbi ndërhyrjen e Rusisë në zgjedhjet presidenciale amerikane të vitit 2016.
Që prej emërimit të tij në krye të ekipit që hetoi ndërhyrjen ruse në zgjedhjet amerikane, Mueller ka folur shumë pak publikisht.
Një version i redaktuar i raportit të tij, konfirmoi ndërhyrjen ruse në zgjedhje dhe dokumentoi përpjekjet e Trumpit për ta minuar hetimin e Muellerit. Por, Mueller tha se nuk ka dëshmi të mjaftueshme, që do të thoshin që Trump dhe ekipi i tij kanë kryer ndonjë krim.
Dëshmia e tij në Kongres ka shumë rëndësi pasi mund ti japë një rrjedhë tjetër garës presidenciale që do të zhvillohet në SHBA vitin e ardhshëm. /Opinion.al
