Ministria ruse e Mbrojtjes tha se këmbimi i të burgosurve të luftës – për të cilin u pajtua me Ukrainën më 2 qershor – ka nisur. Moska tha se një numër i paspecifikuar i të burgosurve, nën moshën 25-vjeçare, do të këmbehen me ushtarët ukrainas.
“Në përputhje me marrëveshjet ruso-ukrainase të arritura në Stamboll më 2 qershor, grupi i parë i ushtarëve rusë nën moshën 25-vjeçare janë kthyer nga territori që kontrollohet nga regjimi i Kievit”, tha Ministria e Mbrojtjes përmes një njoftimi më 9 qershor.
“Në këmbim, një numër i ngjashëm i të burgosurve të luftës nga Forcat e Armatosura të Ukrainës janë transferuar”.
Presidenti ukrainas, Volodymyr Zelensky, që orë më parë shprehu skepticizëm për një rezultat të mirë, konfirmoi se këmbimi ishte në zhvillim e sipër. Ai deklaroi se këmbimi i të burgosurve do të “vazhdojë në disa faza gjatë ditëve në vijim”.
“Procesi është mjaft i ndërlikuar, me shumë detaje të ndjeshme, dhe negociatat vazhdojnë çdo ditë. Ne presim zbatim të plotë të marrëveshjeve humanitare të arritura gjatë takimit në Stamboll”, shtoi ai.
Zyrtarët rusë kanë akuzuar Kievin se po zvarrit procesin e këmbimit të të burgosurve të luftës dhe kthimin e trupave të ushtarëve të rënë. Ata thonë se Rusia veçse i ka ofruar Ukrainës një listë me 640 të burgosur – ku me prioritet janë të plagosurit, të sëmurët rëndë dhe të rinjtë – që do të këmbehen fillimisht.
Ukraina ka hedhur poshtë akuzat se po zvarrit procesin, teksa Shtabi Koordinues i Ukrainës për Trajtimin e të Burgosurve të Luftës ka vlerësuar se pretendimet e Rusisë nuk përputhen me realitetin apo me marrëveshjet e arritura më parë.
Sipas zyrtarëve ukrainas, megjithëse të dyja palët janë pajtuar në parim për kthimin e pothuajse 12.000 ushtarëve të vrarë pas bisedimeve për paqe në Stamboll, nuk ishte caktuar asnjë datë specifike për këmbim.
Ministria e Mbrojtjes e Ukrainës ka akuzuar Moskën se po përpiqet “të rishkruajë” marrëveshjet e arritura në Stamboll dhe të krijojë “pengesa artificiale dhe deklarata të rreme” me qëllim që të shtyjë procesin. Kjo ministri ka paralajmëruar se nëse Rusia shkel premtimet e dhënave, e vë në pikëpyetje besueshmërinë e ekipit negociator rus./REL
