Forcat ruse nisën një sulm me raketa në Ukrainë gjatë natës, duke synuar kryesisht rajonet perëndimore të vendit.
Sipas mediave vendase Forcat Ajrore të Ukrainës kanë shkaktuar një alarm ajror në rajonet Ternopil, Khmelnytskyi dhe Lviv, si dhe në rajonin e kryeqytetit Kiev.
Kërcënimi paraqitet nga raketat balistike dhe lundruese ruse, bombarduesit Tu-95MS dhe dronët e tipit Shahed. Pas sulmit, një zjarr shpërtheu në një fabrikë industriale në rajonin e Kievit. Ekipet e shpëtimit janë në vendngjarje për të vlerësuar shkallën e dëmit dhe nuk është raportuar për viktima.
Ndërkohë ndërprerje të energjisë elektrike u raportuan në Kiev dhe 12 rajone për shkak të tejkalimit të kufijve të konsumit. Këtë e ka bërë të ditur kompania ukrainase e energjisë elektrike Ukrenergo në Telegram.
Ndërprerjet janë në fuqi në Kiev, Volyn, Donetsk, Zhytomyr, Zakarpattia, Zaporizhzhia, Lviv, Mykolaiv, Kirovohrad, Odessa, Rivne dhe Kharkiv. Ukrenergo paralajmëroi gjithashtu për ndërprerje të mundshme në furnizimin me energji elektrike në infrastrukturën kritike. Të premten dhe nga java e ardhshme do të ketë ndërprerje të energjisë elektrike gjatë gjithë ditës, në të gjithë vendin, pas dëmeve të shkaktuara nga bombardimet ruse.
Ndërkaq mbrëmjen e djeshme sistemet ruse të mbrojtjes ajrore shkatërruan 28 dronë ukrainas mbi gadishullin e Krimesë, Detin e Azov, Territorin Krasnodar dhe në rajonet Belgorod dhe Rostov.
“Mbrëmë u ndaluan përpjekjet e regjimit të Kievit për të kryer sulme terroriste duke përdorur mjete ajrore pa pilot të tipit aeronautik kundër objektivave në territorin e Federatës Ruse”, njoftoi Ministria ruse e Mbrojtjes.
