Ministria e Brendshme e Rusisë tha se një ish-zyrtar i Kremlinit, i cili në disa raporte të mediave është cilësuar si spiun i CIA-s, është shpallur zyrtarisht i zhdukur.
Ministria tha se Oleg Smolenkov, i lindur në vitin 1969, është futur në listën e të zhdukurve dhe se hetimet për gjetjen e tij kanë nisur.
Kujtojmë se javë më parë, media prestigjoze si Reuters, CNN, New York Times dhe Washington Post, kanë raportuar se një informator i CIA-s në Qeverinë ruse është nxjerrë nga Rusia dhe është dërguar në Shtetet e Bashkuara në vitin 2017.
Ato nuk e kanë identifikuar personin në fjalë, por kanë thënë se shtetasi rus i ka siguruar inteligjencës amerikane informacione nga rrethi i brendshëm i presidentit rus, Vladimir Putin.
CIA, Departamenti amerikan i Shtetit dhe Shtëpia e Bardhë i kanë cilësuar raportet si të pasakta, ndërsa gazeta ruse Kommersant e ka identifikuar më pas informatorin e supozuar si Oleg Smolenkov.
Regjistrimet publike nga administrata e Qeverisë ruse tregojnë se një person me emrin Oleg Smolenkov ka qenë i punësuar në administratën e Putinit, i cili asokohe ka shërbyer si kryeministër i Rusisë. Smolenkov po ashtu ka punuar si sekretar i dytë në Ambasadën e Rusisë në Uashington.
Sipas raporteve të mediave ruse, Smolenkov është zhdukur me gruan e tij, Antonina, dhe tre fëmijë, ndërsa ka qenë me pushime në Mal të Zi, në qershor të vitit 2017./Opinion.al
