Dy aeroporte kryesore të Moskës kanë pezulluar përkohësisht mbërritjet dhe nisjet e fluturimeve të datës 21 gusht pas pretendimeve të Ministrisë së Mbrojtjes se një dron ukrainas ishte rrëzuar mbi rajonin e Moskës.
Sipas mediave ruse, aeroporti Domodedovo kufizoi fluturimet “për të siguruar masa shtesë të sigurisë së fluturimit”.
Operacionet normale në dy aeroportet ndërkombëtare thuhet se u rifilluan pas rreth dy orësh.
Në orët e para të 20 gushtit, operacionet në Domodedovo dhe Vnukovo u ndërprenë përkohësisht në përgjigje të asaj që zyrtarët e përshkruan si një sulm ukrainas me dron. Ministria e Mbrojtjes tha se kishte çaktivizuar dronin me mjete elektronike mbi Moskë.
Në mëngjesin e 18 gushtit, fluturimet në katër aeroporte të Moskës: Vnukovo, Domodedovo, Sheremetyevo dhe Zhukovsky u pezulluan për rreth 30 minuta pasi autoritetet njoftuan se një dron i rrëzuar ukrainas kishte goditur një ndërtesë disa kilometra në perëndim të qytetit.
Një varg sulmesh të kohëve të fundit me dronë të fajësuara për Ukrainën kanë shkaktuar ndërprerje të transportit brenda Rusisë, duke përfshirë disa mbyllje të aeroporteve në javët e fundit. Më 20 gusht, një stacion hekurudhor në rajonin jugperëndimor të Kurk, në kufi me Ukrainën, u godit nga një sulm me dron, i cili thuhet se plagosi pesë persona.
Menjëherë pas pretendimit se droni ishte bllokuar dhe ishte detyruar të rrëzohej, Ministria Ruse e Mbrojtjes tha se kishte shkatërruar një dron të dytë ukrainas mbi rajonin e Moskës./Opinion.al
