Pandemia COVID-19 vijon të përhapet me ritme të shpejta në të gjithë botën, duke shkaktuar viktima dhe dëme të mëdha ekonomike.
Shpresa e vetme për frenimin e pandemisë është vaksina anti-COVID, për të cilën shumë shkencëtarë po kryejnë teste, por ende nuk është krijuar një vaksinë e miratuar nga institucionet e shëndetësisë botërore.
Deri më tani i vetmi shtet që ka miratuare një vaksinë kundër koronavirusit, është Rusia. Ndërkohë, ky shtet ka paralajmëruar se në 15 tetor do të regjistrojë vaksinën e dytë.
Vaksina është zhvilluar nga Instituti Vektor i Siberisë, i cili përfundoi fazat e testeve klinike te njerëzit javën e kaluar. Në muajin gusht, Rusia zhvilloi vaksinën e parë kundër koronavirusit, e cila u krijua nga Instituti Gamaleya i Moskës, pavarësisht se faza e fundit e vaksinës është ende duke u testuar.
Ekspertët shëndetësorë nga vende të ndryshme kanë shprehur dyshime për vaksinën për shkak të mungesës së provave shkencore për efektivitetin e saj dhe mungesës së transparencës së Rusisë gjatë procesit të testimit. / Opinion.al
