Ofensiva e trupave ruse kundër Ukrainës lindore “ka filluar”.
Kështu deklaroi guvernatori ukrainas i rajonit të Luhanskut, Sergei Gaïdaï.
“Është ferr. Ofensiva ka filluar, ajo për të cilën po flasim për javë të tëra,” tha ai në Facebook. “Ka luftime në Rubizhne dhe Popasna, luftime të pandërprera në qytete të tjera paqësore,” shtoi ai, menjëherë pasi njoftoi në Telegram vdekjen e katër civilëve në Kreminna, një qytet i marrë sot nga rusët.
Presidenti i Ukrainës, Volodymyr Zelensky, tha se ofensiva e frikshme ruse në lindje të vendit ka filluar. “Tani mund të themi se trupat ruse kanë filluar betejën për Donbass, për të cilën janë përgatitur prej disa kohësh. Një pjesë e madhe e ushtrisë ruse tani i është përkushtuar kësaj ofensive”, shkroi Zelensky në llogarinë e tij në Telegram.
Presidenti ukrainas Volodymyr Zelensky iu rikthye kërkesës drejt Perëndimit për armë, duke përcaktuar çdo vonesë në furnizime si “leje që Rusia të vrasë” njerëzit e saj.
“Rreth 5000 fëmijë janë dëbuar” nga rajoni i Mariupolit në Rusi që nga fillimi i pushtimit rus”, tha Zelensky.
Ndërkohë në Mariupol një numër i madh civilësh duke përfshirë gra, të moshuar dhe fëmijë janë strehuar në fabrikën e çelikut Azovstal, ku ndodhen edhe forcat e fundit ushtarake ukrainase të mbetura në qytetin e rrethuar, duke përfshirë edhe batalionin nacionalist Azov. Vdekjet nga bombardimi me raketa që ndodhi mëngjesin e sotëm në rajonin e Lviv shkuan në 7, ku mes viktimave ka edhe një fëmijë./Opinion.al
