Rusia u ka ndarë medalje nderi dhe shtetërore të hënën dy njësive të vendosura në rajonin perëndimor Briansk, në kufi me Ukrainën dhe Bjellorusinë, për rolin e tyre në kapjen dhe arrestimin e të dyshuarve për sulmin në një sallë koncertesh pranë Moskës, ku u vranë së paku 137 njerëz dhe u plagosën 180 të tjerë.
Ministria e Mbrojtjes e Rusisë raportoi të hënën se çmimi shtetëror për guxim dhe çmimi ushtarak për përsosmëri ushtarake, iu prezantuan zëvendëskomandantit të Qarkut Ushtarak të Leningardit, gjenerallejtënant Esedulla Abachev, gjatë një ceremonie në bazën e njësiteve.
Zyrtarët rusë thanë se 11 njerëz janë arrestuar në lidhje me sulmin e 22 marsit në sallën e koncerteve Crocus në periferinë e Moskës, Krasnogorsk, përfshirë katër të dyshuar si kryerës të sulmit.
Më 24 mars, një gjykatë në Moskë ua caktoi masën e paraburgimit me kohëzgjatje dy muaj katër të akuzuarve për terrorizëm në lidhje me sulmin ndaj sallës së koncerteve pranë Moskës.
Gjykata i zbuloi emrat e të dyshuarve si Murodali Rajabalizoda, Dalerjon Mirzoev, Muhammadsobir Faizov dhe Faridun Shamsiddin, dhe tha se ata janë shtetas të Taxhikistanit.
Ata e pranuan fajin për të gjitha akuzat, sipas gjykatës.
Presidenti i Rusisë, Vladimir Putin, pritet ta mbajë një takim të Këshillit të Sigurimit rus, për të biseduar për sulmin gjatë kësaj jave, raportoi televizioni shtetëror rus.
Dëshmi se katër të akuzuarit janë torturuar gjatë arrestimit nga forcat e sigurisë ruse, janë duke dalë në sipërfaqe vazhdimisht.
Ata dolën para gjykatës me mavijosje, njolla gjaku dhe me fytyra të ënjtura.
