Rusia pranoi se kishte dërguar “specialistë” në Venezuelë por tha se ata nuk përbënin kërcënim për stabilitetin e vendit, pasi ishin dërguar nën një marrëveshje bashkëpunimi ushtarak, mes dy palëve. Zëdhënësja e ministrisë së jashtme ruse, Maria Zakharova përshkroi trupat vetëm si “specialistë rusë”.
“Rusia nuk po ndryshon balancën e pushtetit në rajon, Rusia nuk po kërcënon askënd, ndryshe nga zyrtarët në Uashington”, tha ajo për një konferencë javore të lajmeve.
Zyrtarët në Kremlin nuk iu përgjigjën thirrjes së ardhur nga SHBA-ja për të hequr të gjithë personelin ushtarak nga vendi, teksa shtuan se Rusia nuk po ndërhynte në punët e brendshme të Venezuelës dhe se Kremlini shpresonte se edhe vendet e tjera do të lejonin venezuelasit të vendosnin vetë fatin e tyre.
Kujtojmë se dy avionët ushtarakë rus u ulën në aeroportin kryesor të Venezuelës. Mediat vendase raportuan se në ta gjendeshin disa zyrtarë të ministrisë së Mbrojtjes ruse dhe 100 trupa ushtarak. Trump tha të mërkurën se për të detyruar Rusinë të tërheqë trupat ushtarake nga Venezuela, “të gjitha opsionet” janë të hapura, duke e kundërshtuar vendimin e tyre për ndërhyrje në Rusi.
Amerika dhe Rusia ndajnë pikëpamje krejtësisht të ndryshme lidhur me konfliktin politik në Venezuelë, vend ky që po përballet me kolapsin ekonomik dhe një krizë humanitare të thellë.
Shtetet e Bashkuara dhe shumica e vendeve perëndimore përkrahin liderin opozitar, Juan Guaido, i cili ka shpallur veten president të përkohshëm më 23 janar ndërsa Rusia, Kina, Irani, Kuba, Turqia, Bolivia mbështesin Maduron.
Presidenti Maduro drejton vendin prej vitit 2013, dhe fitoi një tjetër mandat presidencial në maj të vitit 2018. Zgjedhjet u bojkotuan nga opozita dhe u kritikuan ashpër nga faktori ndërkombëtar. Maduro është përballur gjithashtu me akuza për abuzime me të drejta të njeriut si dhe për keqmenaxhim të ekonomisë së Venezuelës./Opinion.al
