“Mungesa e motivimit, trajnimit dhe refuzimi për të luftuar në vijën e parë”. Shërbimi inteligjent i Mbretërisë së Bashkuar pasqyroi në raportin e fundit problemin serioz me të cilin përballet ushtria ruse.
Një përfundim i arritur nga Londra, pasi një gjykatë ushtarake dënoi dy ushtarë rusë të premten e kaluar për refuzimin për t’iu bindur urdhrave dhe për t’u kthyer në vijat e frontit në Ukrainë. Në fakt, ky nuk është një rast i izoluar, pasi që nga korriku numri mesatar i ushtarëve rusë të dënuar ishte 100.
“Shkalla e lartë e dënimeve tregon moralin e dobët të ushtrisë ruse dhe hezitimin e disa elementeve për të luftuar”, tha inteligjenca britanike, deklaratën e së cilës e publikoi Ministria Britanike e Mbrojtjes, përmes rrjeteve të saj sociale. Mungesa e stërvitjes, e motivimit dhe stresi i madh janë disa nga shkaqet që çuan në këtë refuzim të ushtarëve, sipas Londrës.
Së fundi, inteligjenca e Mbretërisë së Bashkuar vuri në dukje edhe një nga zgjidhjet e mundshme të Kremlinit për t’i dhënë fund kësaj situate: “Megjithëse disa ushtarë kanë refuzuar të luftojnë, ka shumë të ngjarë që Rusia të zbusë humbjet e saj duke dërguar një masë ushtarësh të trajnuar dobët në vijat e frontit”. E gjithë kjo për të parandaluar një avancim të mundshëm të Forcave të Armatosura të Ukrainës në lindje të vendit.
Mobilizimi i pjesshëm i ushtarëve ishte një nga masat e vendosura nga presidenti rus Vladimir Putin në fund të vitit 2022 për t’iu kundërvënë kundërofensivës ukrainase, e cila preku 300 000 rezervistë ushtarakë, të cilët morën trajnime shtesë dhe një pagë në përpjesëtim me shërbimin e tyre ushtarak aktiv.
