Rusia gjobiti Apple dhe Wikipedia të enjten për mos fshirjen e lajmeve të rreme për luftën e Vladimir Putin kundër Ukrainës.
Një gjykatë ruse e gjobiti Apple me rreth 4,000 euro për dështimin në heqjen e materialit nga Apple Podcast që i konsideronte të rreme, raportoi agjencia shtetërore ruse e lajmeve TASS.
Kjo është hera e parë që Apple përballet me ndëshkime të tilla në Rusi, sipas raportit.
Mësohet se Apple ishte urdhëruar më parë nga Roskomnadzor, rregullatori rus i komunikimit, të heqë nga platforma e saj Podcasts “informacionet në lidhje me operacionin special ushtarak në Ukrainë që synon destabilizimin e situatës politike në Federatën Ruse”.
E njëjta gjykatë më vonë gjobiti Wikipedia me rreth 29,000 euro për të njëjtën vepër.
Kjo është hera e parë që Apple gjobitet për këtë shkelje, raportojnë mediat ruse, ndërsa Fondacioni Wikimedia, që zotëron Wikipedia, është gjobitur shumë herë. Në prill, kompania thuhet se u gjobit për herë të shtatë për mos fshirjen e asaj që tha se ishte “përmbajtje e ndaluar” në lidhje me ushtrinë ruse.
Apple ndaloi shitjen e të gjitha produkteve të saj në Rusi dhe kufizoi shërbimet e Apple Pay në vitin 2022, në përgjigje të pushtimit në shkallë të plotë të Ukrainës nga Kremlini./Opinion.al
