Një ligj që parashikon kontrolle të reja në internet në Rusi ka hyrë në fuqi ditën e sotme. Ligji i ashtuquajtur “Interneti Sovran” është miratuar nga ligjvënësit dhe është nënshkruar nga presidenti Vladimir Putin.
Mbështetësit e ligjit thonë se ai do ta bëjë segmentin rus të internetit, të njohur si Runet, më të pavarur. Sipas tyre, masa është e nevojshme për ta mbrojtur Rusinë nga sulmet potenciale kibernetike.
Ndërkaq, kritikët thonë se ligji do të çojë në censurë dhe do të lejojë mbikëqyrje më të madhe të përdoruesve të internetit nga agjencitë ruse të inteligjencës. Ata e shohin ligjin si aktin e fundit të një dore të hekurt edhe mbi internetin, gjithashtu edhe si pjesë të një fushate të qeverisë për të parandaluar përdorimin e tij për të organizuar protesta ose për të inkurajuar mosbindjen civile./Opinion.al
