Dhjetëra avionë luftarakë rusë kanë arritur në një bazë në rajonin ukrainas të Krimesë. Krimea është aneksuar nga Rusia më 2014.
Avionët e tipeve Su-27 dhe Su-30 të kenë arritur sot në bazën ajrore Belbek. Kështu ka raportuar agjencia e lajmeve Reuters, duke cituar disa dëshmitarë.
Ky njoftim vjen në kohën e tensioneve ndërmjet Ukrainës dhe Rusisë. Marrëdhëniet mes këtyre shteteve janë përkeqësuar edhe më shumë. Kjo pasi më 25 nëntor, Rusia kapi tri anije luftarake të Ukrainës dhe ekuipazhin e tyre, në afërsi të Ngushticës Kërç në Detin e Zi.
Ministri i Jashtëm rus, Sergei Lavrov tha se Ukraina është duke përgatitur një “provokim” në këtë zonë. Sips tij provokimi do të vijë përpara përfundimit të këtij viti. Kievi në anën tjetër, ka akuzuar Moskën se po rritë prezencën e saj ushtarake në afërsi të kufirit mes dy shteteve.
Presidenti ukrainas, Petro Poroshenko ka thënë se Rusia ka vendosur “mbi 80 mijë trupa, 1400 sisteme të lansimit të raketave dhe artileri, 900 tanke, 2300 makina luftarake” dhe qindra avionë në këtë zonë./REL
