Rusia nuk dëshiron që hospitalizimi i liderit opozitar rus, Aleksei Navalny të dëmtojë marrëdhëniet mes Moskës dhe Perëndimit.
Megjithatë Kremlini, ka refuzuar të thotë nëse Navalny është “helmuar” derisa ndonjë substancë të konfirmohet nga testet laboratorike.
“Ne jemi kundër secilit që tenton të bëjë ndonjë kategorizim në kushtet e tanishme. Ne refuzojmë që ta quajmë si rast të helmimit, derisa nuk konfirmohet përfundimisht”, ka thënë Peskov, i cili dhe më herët është shprehur se mjekët gjermanë janë ngutur kur kanë përdorur shprehjen “helmim”.
Gjermania, Shtetet e Bashkuara dhe shtete të tjera perëndimore i kanë bërë thirrje Moskës që të nisë hetime për të kuptuar sesi u sëmur krejt papritmas, Navalny, teksa ishte në një fluturim komercial në Siberi javën e kaluar.
Këto thirrje kanë ardhur pasi mjekët gjermanë të spitalit Charite në Berlin kanë thënë se testimet e para flasin për helmim.
Mbështetësit e kritikut të Kremlinit besojnë se ai është helmuar pasi ka pirë një çaj në aeroportin e Tomskut në Siberi, para se të nisej për udhëtim./Opinion.al
