Ditën e sotme një sulm me armë në një shkollë në Rusi la të vdekur të paktën 13 persona, shtatë prej të cilëve ishin fëmijë.
Sipas mediave të huaja, autori i ngjarjes për kryerjen e këtij akti të rëndë u frymëzua nga të shtënat famëkeqe në shkollën “Columbine”.
Fillimisht u raportua se dy roje sigurie dhe disa fëmijë u vranë dhe u plagosën në shkollën nr. 88 në Izhevsk, kryeqyteti i Republikës së Udmurtit të Rusisë afërsisht 600 milje në lindje të Moskës.
Në pamjet e publikuar shfaqeshin nxënës dhe mësuesi të strukur nën tavolina dhe të fshehur në dollapët e klasave të tyre, ndërsa personi i armatosur kalonte nëpër salla. Studentë të tjerë u plagosën pasi u hodhën nga dritaret për t’i shpëtuar të shtënave me armë.
Videot e postuara në “Telegram” shfaqën momentin kur policët e armatosur u grumbulluan në ndërtesë në kërkim të personit të armatosur, ndërsa oficerë dhe mësues të tjerë çuan fëmijët e frikësuar drejt daljeve.
Më vonë policia e gjeti autorin të vdekur në shkollë pasi ky i fundit vrau veten pasi kreu krimin e rëndë.
Ende nuk dihen motivet që çuan në këtë krim makabër, ndërsa imazhet e kufomës së autorit treguan një shenjë naziste të qepur në këmishën e tij.
Ndërkohë, pistoletat e përdorura në sulm mbanin zinxhirë çelësash të punuar me dorë për të nderuar sulmuesit e Columbine Eric Harris dhe Dylan Klebold, të cilët organizuan një sulm në një shkollë në Kolorado, SHBA, në vitin 1999.
Një zinxhir shfaqte fjalët “Eric” dhe “Dylan”, ndërsa në tjetrin shkruhej “Columbine”.
Më pas, sulmuesi u identifikua si Artyom Kazantsev, një ish-nxënës i shkollës nr. 88, i lindur në vitin 1988.
Daily Mail publikon edhe se çfarë ka shkruar autori i ngjarjes në “Telegram”.
“Ajo që ndodhi nuk është një sulm terrorist. Si e vetmja arsye për atë që ndodhi, ju kërkoj të përmendni urrejtjen. Unë nuk jam anëtar i asnjë organizate ekstremiste, nuk kam kërkesa politike”, thuhet në një mesazh të postuar në Telegram, që mendohet se është shkruar nga sulmuesi.
Ndërkohë, presidenti rus Vladimir Putin denoncoi ngjarjen si një “sulm terrorist çnjerëzor”.
“Presidenti uron shërimin e të plagosurve të mbetur nga ky sulm terrorist çnjerëzor”, u tha gazetarëve zëdhënësi i Kremlinit Dmitry Peskov.
Pamjet video të postuara në aplikacionin e mesazheve Telegram treguan fëmijë të tmerruar dhe një mësues të strehuar brenda në një klasë, ndërsa personi i armatosur endej nëpër sallat./Opinion.al
