Më shumë se 2300 persona janë evakuar nga disa fshatra në Rusi pasi një depo municionesh që ndodhej afër tyre ka marrë flakë dhe kanë nisur shpërthimet.
Lajmi është bërë i ditur nga mediat shtetërore ruse duke cituar Ministrinë e Situatave të Emergjencës.
Ndërkohë agjencia e lajmeve TASS raporton se të paktën 20 persona janë dërguar në spital pasi janë plagosur.
Zjarri ra pasditen e së mërkurës ndërkohë që flakët e shpërndara nga era kanë arritur në depon ushtarake duke çuar në shpërthime sporadike, sikurse ka bërë me dije Ministria ruse e Mbrojtjes.
Kjo depo armatimesh mund të ketë rreth 75,000 tonë municione duke përfshirë edhe armë artilerie, bën me dije agjencia RIA Novosti duke cituar shërbimet e emergjencave.
Të paktën 14 fshatra janë evakuar në një distancë prej 5 km nga depoja, ndërsa një rrugë automobilistik u mbyll, siç bën me dije Reuters. Më shumë se 20 godina të vendosura në zona të banuara janë djegur, ndërsa raportohet se ka nisur një hetim për ngjarjen./Opinion.al
