Në Khabarovsk, qytet në lindje të Rusisë, u zhvillua gara e përvitshme me fëmijë të të gjitha moshave, të cilët morën armët për të treguar “talentin” e tyre në montimin dhe çmontimin e tyre.
Rreth 240 fëmijë, garuan për të vendosur se cili prej tyre do ta montojë më shpejt kallashnikovin, që duket se është një krenari kombëtare për rusët.
Fituesi i garës, u zgjodh një 16-vjeçar i quajtur Igor Sokolov. Ai e bëri armën gati për 16,76 sekonda dhe rrëfeu se stërvitet prej gjashtë vitesh në montimin e armëve. Më tej, adoleshenti sqaroi se praktika e vazhdueshme është edhe sekreti i suksesit.
Në garë ra në sy dhe pjesmarrja e 6-vjeçares, Daryana Tarasova, e cila arriti të vendoste të gjitha pjesët në vendin e duhur, duke formuar një Kallashnikov të plotë, gati për të gjuajtur. E ëma e saj tha se ajo i është bashkuar njësisë “Ynarmia”, Lëvizjes së Kadetëve të Rinj të Ushtrisë Ruse.
“Ne nuk mësojmë vjersha, por rregullat ushtarake”, tha mamaja e vogëlushes, Yekaterina Schukina, për Reuters.
Kallashnikovi, në dy versionet e veta, AK-47 dhe AK-74, mbetet ende një prej armëve më të përdorura nga ushtria ruse dhe ato të shteteve që dikur kanë qenë pjesë e ish-Bashkimit Sovjetik./Opinion.al
