Deputetja Rudina Hajdari ka deklaruar këtë të enjte se do të kandidojë në qarkun e Elbasanit në zgjedhjet e 25 Prillit. Lajmin e ka bërë të ditur vetë Hajdari përmes një njoftimi në mediat sociale.
“Kam vendosur që në zgjedhjet e ardhshme parlamentare të kandidoj në qarkun e Elbasanit si kandidate e “Nismës Thurje”. Zgjodha Elbasanin jo vetëm se ndjehem e bekuar që jam larë në lumin Shkumbin, kam pirë nga burimet e pastra të ujit dhe kam kaluar një pjesë të fëmijërisë, por së bashku me të rinjtë besojmë se Elbasani mund të zhvillohet si qendër industriale dhe jo të damkoset si vend i krimit” tha Hajdari.
Më tej, Rudina Hajdari thotë se ka ardhur koha që të gjithë të rebelohemi ndaj klasës së vjetër politike.
“Ka ardhur koha që të gjithë të rebelohemi ndaj klasës së vjetër politike dhe kjo mund të ndodhë vetëm nëse ndihmojmë ata që marrin guximin të përballen. Nëse je nga qarku i Elbasanit të ftoj të regjistrohesh te rudinahajdari.al dhe menjëherë do të kontaktoj për një takim, që të jesh pjesë e ekipit”, thotë ajo./ Opinion.al
