Marrëveshja e 5 qershorit lidhur me reformën zgjedhore duket se ka hyrë sërish në ngërç. Pas refuzimit të opozitës parlamentare për ta votuar dhe vendimit të Kryeinistrit Rama për të pranuar kërkesën e tyre mbi hapjen e listave, është opozita jashtëparlamentare ajo që e ka quajtur të prishur këtë marrëveshje.
Pjesë e diskutimeve të tryezës për reformën dhe një nga mbështetëset kryesore të listave të hapura, paraditen e sotme deputetja Rudina Hajdari gjatë një daljeje për mediat e quajti qëndrimin e kryedemokratit Basha një premtim të pambajtur. Duke sjellë një video të vitit 2017, ku Basha fliste për lista të hapura, Hajdari tha se që kur hapi fushatën PD premtoi lista të hapura.
“Që në 2017 kur PD hapi fushën elektorale premtoi lista të hapura dhe se lista do të zgjidhej nga qytetarët dhe jo më kryetari i partisë. Një zotim që unë e kam marrë seriozisht dhe se kjo do të jetë beteja që unë kam vendosur për shqiptarët në zgjedhjet e ardhshme. Pra siç e shikoni ky ishte një premtim që nuk u mbajt dhe në fakt në politikë duhet të mbash një qëndrim të qartë dhe të jesh koherent me publikun. Nuk e di nëse e kam këtë prej origjinës apo i ka ardhur koha që të mbahen premtimet ndaj qytetareve. Dua t’u them qytetarëve që ajo që kërkoj unë të dal si kandidate në një listë të mbyllur ashtu siç u futa në një të tillë si e bija e Azem Hajdarit, por që nesër të dal si Rudina Azem Hajdari që nuk ka frikë nga vota e qytetarëve dhe ta marrë atë votë me meritë të plotë”.-tha Hajdari/Opinion.al
