Deputetja e Partisë Demokratike, Rudina Hajdari, ditën e sotme, është shprehur kundër debatit të krijuar në Komisionin e Medias, ndërsa degjeneroi në sherr e tension mes deputetëve të PD-së dhe kryebashkiakut Erion Veliaj.
Shkak u bë prania e kryetarit Veliaj në krah të Ministres së Kulturës, Mirela Kumbaro, gjatë seancës dëgjimore për projektin e Teatrit Kombëtar.
Hajdari edhe pse nuk ka shprehur asnjë herë qëndrimin e vet në grup, megjithëse të hënën u bë mbledhje për këtë çështje, ka preferuar të thyejë rregulloren e GPPD.
Përmes një shënimi të shkurtër në Twitter, deputetja e PD-së shkruan se shfaqja e sotme në Komisionin e Medias, nuk i shërbeu aspak kauzës së teatrit; por u kthye në një boks-politikë, duke mos dhënë asnjë rezultat.
Sipas saj, mos trajtimi i temës së Teatrit i shërbeu Erion Veliajt e interesit të tij të ngushtë, por jo opozitës, artistëve dhe qytetarëve.
Rregullorja sqaron në nënin 10, pika 1. se për çdo inciativë personale deputeti njofton paraprakisht Kryetarin apo Nënkryetarin e Komisionit që përfaqëson GPPD dhe koordinon veprimtarinë e tij me atë të Grupit Parlamentar.
Kurse neni 19, pika 1. thekson se deputetët e GPPD nxiten të përdorin teknologjinë e informacionit për komunikimin midis tyre. Posta elektronike zyrtare apo metodat kolektive të komunikimit elektronik, përdoren vetëm për qëllime të marrjes dhe dhënies së informacionit dhe është e ndaluar të përdoren për komunikime apo përgjigje të panevojshme për qëllimet e punës.
Ndërkohë që qëndrimi i saj ka qenë i prerë për mosprishjen e teatrit dhe plotësimin e kërkesave të artistëve. Nuk dihet me saktësi se çfarë e ka bërë deputeten Hajdari të jetë kundër vendimit të grupit të saj parlamentar. Ajo që shihet qartë është pëlqimi që i ka dhënë kryetari i Bashkisë së Tiranës, Erion Veliaj postimit të saj.
Për çështjen e Teatrit Kombëtar opozita vendosi të thërrasë sërish në seanca të ndara dëgjimore në Komisionin e Medias të hënën dhe të martën e ardhshme Ministren Kumbaro dhe kryebashkiakun Veliaj.
