Në një konferencë për mediat deputetja Rudina Hajdari tha se opozita dhe qeveria e kanë penguar rrugëtimin e Shqipërisë drejt Bashkimit Europian.
Sipas saj protestat e opozitës po dëmtojnë qytetarin e thjeshtë dhe imazhin e Shqipërisë në tërë botën.
“Nga njëra anë opozita jashtëparlamentare, e cila dogji mandatet e deputetit dhe nuk pranoi të hynte në zgjedhjet e 30 qershorit, pasojat e së cilës janë regresive dhe shkatërruese ndaj popullit shqiptar, po pengon rrugën drejt zhvillimit dhe hapjes së negociatave drejt Integrimit Europian, duke zhvilluar protesta të dhunshme që dëmtuan qytetarin e thjeshtë dhe imazhin e Shqipërisë nëpër tërë botën”
Ajo madje bëri thirrje për një transparencë të burimeve financiare të çdo partie. Ky apel i saj vjen pas akuzave që javët e fundit i janë bërë kreut të PD, Lulzim Basha në lidhje me financimin rus për lobimin në amerikë.
“Duhet të shikojmë me vëmendje se nga vijnë burimet financiare të cdo partie, që tashme duket sikur janë kthyer në korporata që janë në shërbim të kryetarëve të tyre. Mungesa e demokracisë brënda tyre ka sjellë një përçarje të elektoratit dhe spektrit politik.”
Sipas saj Bashkimi Europian kërkon fakte konkrete në luftën kundër korrupsionit në rangjet më të larta.
“E vërteta është se vendet e Bashkimit Evropian duan të shohin fakte dhe rezultate konkrete të Reformës në Drejtësi dhe të luftës kundër korrupsionit e kriminalilitetit në rangjet më të larta sepse është e vetmja mënyrë që ne mund t’i shërbejmë qytetarëve Shqipëtarë”
Nga ana tjetër Hajdari bën përgjegjëse qeverinë për varfërinë, institucionet e dobta, emigrimin e të rinjve, korrupsionin dhe zvarritjen e reformës në drejtësi
“Mazhoranca e ka zvarritur zbatimin e reformës në Drejtësi. Reforma në Drejtësi dhe Lufta kundër Korrupsionit deri më sot ka mbetur vetëm në letër. Ky konstatim vërehet qartazi sepse nuk ka Gjykatë Kushtetuese, nuk ka Gjykatë të Lartë, nuk ka procedime dhe gjykime për zyrtarë të lartë shtetëror.”
Deputetja Hajdari bëri gjithashtu thirrje për ndryshim të kodit zgjedhor sipas rekomandimve të OSBE/ODHIR-it, respektim të Kushtetutës, zgjedhje të lira dhe paqësore dhe distancim nga nxitja e dhunës. Kjo e fundi sipas saj i shërben vetëm interesave të politikanëve dhe lojrave të tyre politike. /Opinion.al
