Kryetari i Kuvendit Gramoz Ruçi u ka tërhequr vëmendjen deputetëve sot për të bërë raportime reale, që lidhen me punën e tyre në komisione sipas interesit publik dhe jo thjesht raportime formale.
Ruçi tha se qytetarët janë aksionerë në Televizionin Publik Shqiptar, duke shtuar se deputetët nuk shqetësohen se kur do të transmetohet fjala e tyre. Ai gjithashtu foli edhe për kanalin “RTSH Kuvend”.
“Ne jemi përfaqësues të atyre që na kanë zgjedhur, ata na shtrojnë pyetje: Çfarë raportimi dhe diskutimi bëni ju, kur TVSH ka tetë kanale dhe unë që ju kam çuar në atë sallë, nuk i ndjek dot, dhe ju flisni në Parlament për paradat dhe sukseset. A është kështu? Zoti Musaj, a është kështu? Me 12 mijë lekë është i vetmi televizion ku taksapaguesit janë aksionarë. 12 mijë lekë e paguajnë ata, ne si të zgjedhurit e tyre, zgjedhësve tanë u jemi borxhlinj dhe debati në komision duhet përfshirë në parlament. Vërtitet një ide për “RTSH Kuvendi”, diskutojnë deputetët dhe nuk vrasin mendjen kur do transmetohet fjala e tyre. Një pjesë e zgjedhësve tanë janë me aftësi të kufizuara, kërkojnë nga ne kur TVSH do t’i mundësojë t’i ndjekin. Raportimet në Kuvend, nuk duhet të jenë formale, duhet të jenë efektive brenda gjithë shqetësimeve që kanë njerëzit që na kanë zgjedhur”, tha Ruçi./Opinion.al
