Shtetet e Bashkuara u kanë kontaktuar disa vendeve për t’i nxitur ato të pranojnë zhvendosjen “vullnetare” të palestinezëve që ikin nga operacionet izraelite në Gaza, sipas Sekretarit amerikan të Shtetit, Marco Rubio.
Izraeli ka paralajmëruar përsëri popullsinë e Gazës, e cila është zhvendosur pothuajse tërësisht që nga shpërthimi i luftës pas sulmit të 7 tetorit 2023 ndaj Izraelit nga Hamasi, për një sulm të ri, i cili vjen pas një bllokade prej më shumë se 2 muajsh.
Presidenti Donald Trump ka shqyrtuar vazhdimisht zhvendosjen e dy milionë banorëve të Gazës përpara rindërtimit të enklavës.
“Nuk ka deportime”
Duke iu përgjigjur një pyetjeje gjatë një seance dëgjimore para Komitetit të Senatit për Marrëdhëniet me Jashtë, Marco Rubio deklaroi se “Nuk ka deportime”.
“Ajo që diskutuam me disa vende është nëse dikush është i gatshëm të shkojë diku tjetër për një periudhë kohore sepse është i sëmurë, sepse fëmijët e tij duhet të shkojnë në shkollë apo çfarëdo qoftë, a ka vende në rajon që janë të gatshme t’i mirëpresin ata për një periudhë të caktuar kohore?” shtoi ai
SHBA-të thonë se nuk do të dërgojnë refugjatë palestinezë në Libi. Kreu i diplomacisë amerikane nuk specifikoi se me cilat vende ishte kontaktuar SHBA-ja, por mohoi që Libia të ishte midis tyre.
Rrjeti televiziv amerikan NBC Neës, raportoi së fundmi se administrata Trump po punon për një plan që do të zhvendosë përgjithmonë deri në një milion palestinezë nga Rripi i Gazës në Libi.
