Aplikacioni shumë i përdorur, WhatsApp, mund të shtojë opsionin Chat Lock, nëpërmjet të cilit përdoruesit do të kenë mundësi të bllokojnë një bisedë, e cila mund të lexohet vetëm me një akses me gjurmën e gishtit ose një fjalëkalimi. Madje nëse dikush tjetër do të tentojë të hapë këtë bisedë dhe nuk arrin vërtetimin, atëherë ajo do të fshihet.
Nëse në WhatsApp keni zhvilluar biseda konfidenciale ose thjesht jeni të kujdesshëm ndaj shqetësimeve të privatësisë në përgjithësi, kjo veçori që aktualisht është duke u testuar mund të jetë e dobishme në të ardhmen e afërt.
Aplikacioni në pronësi të Meta mund t’i lejojë përdoruesit të kyçin bisedat e tyre specifike përmes gjurmës së gishtit ose kodkalimit.
Shtesë e shtuar e sigurisë
Aktualisht, WhatsApp lejon përdoruesit të kyçin aplikacionin përmes një Face ID, por kjo mund të mos jetë e mjaftueshme për dikë që përdor aplikacionin gjerësisht dhe dëshiron të bllokojë disa biseda që mund të mbajnë informacione të ndjeshme.
Me opsionin e ri Chat Lock, bisedat me kod nuk do të jenë të dukshme në listën e chat-eve të aplikacionit. Funksioni mund të aktivizohet direkt nga menja e informacioneve të chat-it, dhe me kontakte të veçanta, por edhe me grup.
Të gjitha këto biseda të etiketuara do të jenë të dukshme vetëm në një tjetër dritare, pas vendosjes së gjurmës së gishtit apo fjalëkalimit. Ndërkohë që foto dhe video në bisedat e fshehta nuk do të jenë automatikisht në galerinë e smartphone-it siç ndodh me komunikimet tradicionale.
Ashtu si “Arkivat” në WhatsApp, bisedat e kyçura do të shfaqen në një seksion të veçantë brenda aplikacionit.
Ky funksion mund të bëhet i disponueshëm në një përditësim të ardhshëm.
WhatsApp po punon gjithashtu në një veçori të dedikuar të bisedës audio së bashku me aftësinë për të redaktuar tekste.
