Kreu i Policisë së Shtetit, Muhamet Rrumbullaku ka reaguar pas vrasjes së efektivit Novruz Cenalia në Fier.
Në një deklaratë për shtyp, numri një i policisë së shtetit paralajmëron se uniformat blu do të bëjnë gjithçka për ta vendosur para ligjit autorin e vrasjes së Novruz Cenalisë.
Ndërsa shpreh ngushëllimet për familjen, Rrumbullaku thekson se uniforma e Policisë së Shtetit është e shenjtë dhe kush cënon uniformën e policisë do marrë përgjigjen më të ashpër ligjore.
DEKLARATË PËR SHTYP:
Policia e Shtetit dhe unë personalisht ndjehemi thellësisht të tronditur nga vrasja e punonjësit të policisë Novruz Cenalia, mesditën e 13 Majit 2024.
Ndarja e parakohshme nga jeta e një djali të ri si Novruz Cenalia na ka hidhëruar të gjithëve, familjen e tij, që është zhytur në lot e zi, dhe familjen e madhe të Policisë së Shtetit.
Për të gjithë ne, kjo dhimbje bëhet edhe më e hidhur kur jeta e një punonjësi të Policisë së Shtetit ndërpritet nga dora e një vrasësi, që ende është i lirë. Unë zotohem në emër të Policisë së Shtetit se, do të bëjmë gjithçka për ta vendosur para ligjit autorin e vrasjes së Novruz Cenalisë.
Shpreh bindjen se i gjithë opinioni publik ndodhet sot përkrah familjes Cenalia dhe Policisë së Shtetit dhe do të ndihmojë në kapjen e autorit të krimit.
E kam theksuar me forcë, edhe pak ditë më parë, gjatë ceremonive përkujtimore për të rënët e policisë, se uniforma e Policisë së Shtetit është e shenjtë. Kushdo që guxon të cenojë uniformën e policisë, shëndetin dhe jetën e punonjësve të saj, do të marrë përgjigjen më të ashpër ligjore.
Drejtori i Përgjithshëm i Policisë së Shtetit,
Drejtues Madhor Muhamet Rrumbullaku
