Kongresisti amerikan Eliot Engel gjatë qëndrimit të tij në qytetin e Gjakovës ka marrë pjesë në ceremoninë e emërtimit të rrugës Ponoshec-Qafë Morinë me emrin e tij.
Në pritje në pikën kufitare në Qafë Morinë, amerikanin që njihet si miku i madh i shqiptarëve e pritën shumë qytetarë dhe figura tjera politike si presidenti i Shqipërisë Ilir Meta, kryetari i komunës së Gjakovës Ardian Gjini si dhe Rifat Jashari.
Por për këtë ceremoni deputetja Rudina Hajdari, ka hedhur akuza të forta në drejtim të PD-së dhe Presidentit duke thënë se nuk është lejuar që të marrë pjesë në ceremoninë që do të zhvillohet në Tropojë, atje dhe ku ndodhet një bust i të atit.
Rudina Hajdari akuzon kryetarin e PD-së në qytet se nuk e ka lejuar të jetë atje, ndërsa thotë se në Gjakovë ajo do të jetë e pranishme së bashku me vëllezërit e saj. Nën akuzë Rudina Hajdari vë dhe Presidentin Meta.
Ja çfarë shkruan Rudina Hajdari
Zoti President dhe zoti Besnik Dushaj, kur të jeni sot para bustit të tim eti në Tropojë, duke u hequr si pro-Amerikan të thekur, mos harroni t’i thoni tim eti që fëmijët e tu nuk janë këtu se kështu urdhëroi Partia. Mua më ndaluat të vi në Tropojë, por në Kosovë jo.Rrugë të mbarë./ Opinion.al
