Kryetari i Partisë Demokratike, Lulzim Basha ka zhvilluar një takim me qytetarët e ish-Kinostudios në Tiranë.
Basha ka folur përsëri në lidhje me rrugën Milot-Balldren, duke theksuar atë si një aferë korruptive, ku është i përfshirë dhe vet kryeministri Edi Rama.
Kryedemokrati theksoi se në Tiranë do të ndërtohen disa kulla, në një kohë kur qytetarët shqiptarë vujanë nga varfëria.
Sipas tij, taksat që qeveria “Rama” u ka vënë bizneseve ua jep një grushti hajdutësh të cilët punojnë për interes të Ramës.
“Kjo bandë kriminale është vërsulur si kurrë ndonjëherë në histori në atë që po luhet janë paratë e vogëlushëve shqiptarë, djersa e prindërve të tyre. Stekat janë të larta, 269 mln euro është një prej tyre për 17 km rrugë. Për Milot-Balldrenin, rrugën e florinjtë. Bota iu ka vënë emra të ndryshëm rrugëve tregtare. Rama po bëhet gati të ndërtojë rrugën e florinjtë, jo për qytetarët por për një grusht hajdutësh të babëzitur. 296 mln euro për 17 km. Shumë prej jush këtë javë keni qenë derë më derë tek biznesi i vogël. Keni trokitur për t’i njohur me platformën tonë, me programin tonë. Për t’iu dhënë një program shprese. Ne të gjithë e dimë se cili është ky program, detyra jonë ta dijë gjithë Tirana e Shqipëria. Dua t’i drejtohem çdo biznesi në Tiranë e tiu them se të gjitha këto taksa që keni paguar këto vite qeverisë dhe Uriah Hipit të bashkisë, të gjitha këto taksa bashkë, janë e barabartë me këtë shumë që Edi Rama po e jep me një dorë për 17 km.
Ditët e fundit ndërkohë që rilindja është në vdekje klinike dhe laku i është ngushtuar si nga lëvizja popullore ashtu dhe nga faktori ndërkombëtar, në këto ditë të fundit krimet korruptive po marrin masa të papërballueshme. Taksat e 4 viteve po jepen me një dorë, pa garë,290 mln euro. ja ku çon makutëria e një bande që qeveri nuk është. Nuk erdhi si produkt i votës së lirë. Nuk e ka lidhur fatin me qytetarët por me këta 6 apo 7 oligarkë, me disa pronarë mediash që qëndrojnë pas tyre dhe ndonjëherë para tyre dhe me një grusht kriminelësh. Këta janë serumi që e mban akoma në koma organizatën kriminale të Rilindjes”, deklaroi Basha./ Opinion.al E.Xh.
