Komisioni i Prokurimeve Publike ka vendosur ditën e mërkurë të anulojë koncesionin e Rrugës së Kombit, që u fitua nga kompania turke “Vendeka Bigli”.
Pas shqyrtimit të ankesës së bërë në Komisionin e Prokurimit Publik, nga bashkimi i kompanive të dyta në garë për këtë rrugë “Catalys and Salillari”, për skualifikim të padrejtë, Komisioni ka vendosur ta pranojë ankesën.
KPP, në qëndrimin zyrtar thotë se vendosi të anulojë vendimin e Komisionit të Vlerësimit të Ofertave të Autoritetit Kontraktues për skualifikimin e ofertës së paraqitur nga Bashkimi i Operatorëve Ekonomik “Catalys and Salillari” dhe të korrigjojë shkeljet duke e kualifikuar atë.
Po ashtu, në raportin e KPP vendoset të anulohet vendimi i Komisionit të Vlerësimit të Ofertave të Autoritetit Kontraktues për kualifikimin e ofertës së paraqitur nga Bashkimi i Operatorëve Ekonomikë, “Vendeka Bigli” dhe të korrigjojë shkeljet duke e skualifikuar atë.
Komisioni i Prokurimit Publik udhëzon Autoritetin Kontraktor, që në këtë rast është Ministria e Transporteve, që të korrigjojë shkeljet dhe më pas të vazhdojë me procedurën e prokurimit të kontratës.
Brenda 10 ditëve, sipas KPP, Ministria e Transporteve duhet të verë në dijeni KPP, për zbatimin e vendimit, duke dokumentuar veprimet e kryera. Pas qëndrimit të Transporteve pritet të meret një vendim, se si do të procedohet për koncesionin e Rrugës së Kombit.
Do të rihapet sërish gara apo shpallet automatikisht fitues bashkimi kompanive “Catalys and Salillari”.
Rruga e Kombit është parashikuar të jepet me koncesion për mirëmbajtje për 30 vite dhe tarifa e kalimit për qytetarët të jetë 5 euro.
