TIRANE – Njësia Task Force që u krijua 3 muaj më parë dhe varej nga Krimet e Rënda do të shkrihet. Lajmi është zyrtar dhe bëhet i ditur nga zyra e shtypit e organit të akuzës. “Prokurori i Përgjithshëm, Adriatik Llalla, ka vendosur ristrukturimin e Njësisë Task-Force për Antikorrupsionin për shkak të përfundimit të periudhës së komandimit të katër prokurorëve të caktuar në shtator 2015”, thuhet në njoftim. Kjo njësi kishte për qëllim hetimin e zyrtarëve të lartë që kapeshin për korrupsion.
Por kjo gjë s’ka ndodhur dhe vetë prokuroria e pranon, teksa sqaron se nuk pati padi për këto lloj rastesh. “Ngarkesa e kësaj njësie nuk ka qenë e lartë, pasi nuk ka pasur referime për korrupsionin në radhët e zyrtarëve të nivelit të lartë, gjatë muajve të fundit, nga institucionet e ngarkuara me ligj”, thuhet në njoftimin e prokurorisë.
Por cili është misioni i ri?
Njësia Task Force tani nuk do të ketë më qëllim hetimin e zyrtarëve të lartë për korrupsion, (nuk kishte raste të tilla). Struktura e re e drejtuar nga prokurorë të rinj do të ketë si objekt hetimin e rasteve të terrorizmit.
Në njoftim thuhet se: Njësia Task-Force do të drejtohet nga Gentian Osmani. Prokurorët që ishin të komanduar do të rikthehen në pozicionet e tyre të mëparshme. Nga sot Njësia Task-Force e Prokurorisë për Krime të Rënda do të hetojë për personat e dyshuar për terrorizëm.
