Prodhuesit e pemtoreve në Lushnje nuk kanë vendosur asnjëherë rrjeta për të mbrojtur pemtoret nga breshëri.
Për fermerët ato janë të shtrenjta, ndaj plantacionet e tyre shpeshherë janë dëmtuar nga stuhitë dhe breshëri.
Kërkesat e vazhdueshme të prodhuesve për ndihmë drejtuar qeverisë, këtë herë ranë në veshin e duhur. Për herë të parë në skemën kombëtare bujqësore aplikohet për t’u bërë pjesë e përfitimit të rrjetave kundër breshërit.
“Rjetat kundër breshërit janë një kërkesë e fermerëve, të cilët kanë plantacione me pemë frutore, agrume apo vreshta. Më në fund, shteti shqiptar hap një skemë kombëtare, ku u jepet mundësia të gjithë fermerëve të aplikojnë për të fituar rrjeta kundër breshërit nga një deri në pesë hektarë, dhe shuma që jep shteti për një hektar është rreth 17 milionë lekë të vjetra”, thotë gazetarja Anila Sefa.
Florian Topi nga fshati Barbullinj i Lushnjes, pasi dëgjoi për mbështetjen që jep këtë vit shteti shqiptar në skemën e bujqësisë për rrjetat e breshërit, ka shkuar menjëherë për t’u interesuar pranë institucioneve.
Çdo vit plantacioni i tij i pjeshkëve është dëmtuar nga fatkeqësitë natyrore, por nga ana financiare për të ka qenë e pamundur të blihej. Një hektar pemtore, sipas fermerit, për t’u mbuluar me rrjetë kushton 24 milionë lekë të vjetra, shumë e shtrenjtë krahasuar me fitimin e prodhimit.
I gjithë prodhimi i plantacionit me pjeshkë po shkon për eksport. Çmimi është i lartë dhe për kultivuesit ky vit ka qenë i mbarë, pasi i shpëtoi goditjes së breshërit.
Sipas Florianit, gjatë 20 viteve punë, plantacioni i tij është dëmtuar rëndë katër herë nga breshëri, duke mos tregtuar asnjë kg pjeshkë, ndërsa pjesërisht goditet çdo vit nga fatkeqësitë natyrore.
Fermerët që kanë blloqe ekzistuese me pemë frutore, vreshta dhe agrume kanë nisur aplikimin për rrjetat kundër breshërit. Masa e mbështetjes nga qeveria është për sipërfaqet e mbjella nga 1 deri në 5 ha, me 1,5 milionë lekë për hektar./Klan News
