Pas rrjedhjes se informacionit të klasifikuar nga Shtëpia e Bardhë mbi planet e Washingtonit për të sulmuar rebelët Houthi të Jemenit, Sekretari Amerikan i Mbrojtjes Pete Hegseth sulmoi gazetarin që ishte bërë pjesë e Grupit në ‘’Signal’’ duke e quajtur atë një mashtrues të diskretituar.
Hegseth i cili pasi nxori zemërimin e tij ndaj kryeredaktorit te “The Atlantic” tha se në fakt në këtë grup nuk kishte asnjë rrjedhje informacioni apo diskutime për plane lufte mes zyrtarëve të lartë Amerikan.
Vetë Hegseth, i cili ishte pjesë e grupit ne Signal refuzoi diskutimin e planeve të luftës ndërkohë që kryeredaktori i ‘’The Atlantis’’ Jeffrey Goldberg në fakt konfirmoi se kishte pasur akses në këto biseda.
Presidenti Amerikan Donald Trump u shpreh mbrëmjen e të hënës se ai nuk kishte asnjë informacion mbi rrjedhjen e informacionit te klasifikuar, por vetëm pak minuta më vonë Shtëpia e Bardhë konfirmoi rrjedhjen e informacionit.
JD Vance ishte pjesëmarrësi më i lartë i administratës Trump në grupin e Signal.
Ndërsa zëvendës-presidenti zakonisht ka qenë në një linjë me presidentin Donald Trump në komentet e tij publike mbi politikën e jashtme, në diskutimet private ai tha se mendonte se administrata po bënte një gabim duke ndërmarrë veprime ushtarake.
Ai vuri në dukje se forcat e shënjestruara Houthi përbënin një kërcënim më të madh për transportin evropian, ndërkohë që rreziku për tregtinë amerikane ishte minimal.
“Nuk jam i sigurt se presidenti është i vetëdijshëm se sa e papajtueshme është kjo me mesazhin e tij për Evropën tani”, shkroi Vance, sipas kryeredaktorit të Atlantic.
Zëvendëspresidenti vazhdoi duke thënë se ai do të mbështeste atë që vendosi ekipi dhe se do i mbante për veten shqetësimet e tij.
Gjatë një mbledhjeje të kabinetit, i pyetur nga vetë Goldberg, Trump tha se nuk ishte në dijeni për rastin.
