Ministria e Mbrojtjes ka bërë publike shifrat e rritjes së trajtimit financiar për Forcat e Armatosura.
Përmes një njoftimi, ministria thotë ky trajtim do të prekë në mënyrë të veçantë disa prej strukturave që konsiderohen asete kombëtare, brenda FA-ve, siç janë Forcat Speciale, ato Komando, zhytësit e FD, skuadrat e kërkim – shpëtimit, specialistët e Mbrojtjes nga Armët e Dëmtimit në Masë, Policia Ushtarake, e deri te mjekët dhe infermierët që shërbejnë në uniformë.
Të gjitha këto kategori do të marrin një shtesë të re mbi pagën mujore, bazuar në këtë vendim.
KATEGORITË QË PËRFITOJNË:
– efektivët e Forcave Speciale do të kenë trajtim financiar shtesë që shkon deri në 40000 lekë në muaj;
– Forcat Komando 30000 lekë në muaj;
– ndër këto kategori janë edhe efektivët e kërkim – shpëtimit, të cilët do të marrin deri në 30000 lekë në muaj shtesë mbi pagën;
– efektivët e Asgjësimit të Mjeteve Shpërthyese, (Explosive Ordnance Disposal – EOD) do të marrin deri 25000 lekë shtesë në muaj;
– ndërsa ata të Mbrojtjes nga Armët e Dëmtimit në Masë (MADM) deri në 25000 lekë në muaj;
– ndërkaq deri në 25000 lekë në muaj do të jetë trajtimi financiar shtesë që do të marrin efektivët e Policisë Ushtarake;
– një kategori e veçantë janë edhe mjekët e infermierët që shërbejnë në FA. Për mjekët është përcaktuar që të kenë një trajtim financiar shtesë deri në 25000 lekë në muaj, ndërsa për infermierët deri në 18000 lekë shtesë mbi pagën në muaj.
Disa kategori të tjera që përfitojnë rritje të konsiderueshme të trajtimit financiar në vendimin e miratuar nga Qeveria shqiptare janë forcat ushtarake që veprojnë në terren.
Në këtë kategori bëjnë pjesë strukturat e konsideruara asete kombëtare, siç janë Forcat Speciale, ato Komando, Zhytësit e FD, skuadrat e kërkim-shpëtimit, specialistët e Mbrojtjes nga Armët e Dëmtimit në Masë, Policia Ushtarake, e deri te mjekët dhe infermierët që shërbejnë në uniformë.
Përmirësimi i ndjeshëm i trajtimit financiar do të rrisë jo vetëm motivimin e efektivëve aktualë, por do të nxisë më tepër të rinjtë për t’u bërë pjesë e Forcave të Armatosura, të cilat ofrojnë karrierë dinjitoze dhe të ardhura përherë e më të mira.
