Pas vendimit të marrë nga Urdhri i Stomatologut për rritjen e çmimeve të një sërë shërbimesh dentare, burime për “Panorama” bëjnë me dije se Ministria e Shendetesise dhe Mbrojtjes Sociale ka vendosur që këtë çështje ta dërgojë në gjykatë.
Sipas Ministrisë, Urdhri i Stomatologut nuk tager për një vendim të tillë dhe ka tejkaluar kompetencat e tij, ndaj rritja e tarifave nuk do të ndodhë sepse vendimi i Urdhrit të Stomatologëve është i paaplikueshëm.
Sipas burimeve të “Panorama”, Ministria Shëndetësisë ka votuar kundër vendimit të Urdhrit të Stomatologëve dhe ka argumentuar këtë qëndrim me faktin se nuk është në tagrin ligjore të kësaj strukturë të vendos çmimet që diktojnë tregun.
Dje Urdhri i Stomatologut ka zhvilluar mbledhjen e Asamblesë Kombëtare, ku ka vendosur çmimet dysheme për 13 shërbimet kryesore që ofrojnë dentistët. Lista, me çmime thuajse të dyfishuara, iu dikton klinikave dentare ndalimin e kryerjes së shërbimeve stomatologjike poshtë çmimeve të vendosura nga Urdhri Stomatologut.
Kjo listë e çmimeve i është përcjellë Ministrisë së Financave, e cila me kërkesë të Urdhrit të Stomatologut do të bëjë të mundur ndërhyrjen në kasat fiskale për të vendosur çmimet dysheme për shërbimet që do të kryejnë qytetaret. Ndërkohë që në këtë vendim theksohet se për shërbimet e tjera, stomatologët janë të lirë të vendosin çmimet që dëshirojnë./E.M
