Josep Borrell, Përfaqësuesi i Lartë i Bashkimit Europian për Çështjet e Jashtme dhe Politikat e Sigurisë, tha se kriza e rritjes së çmimeve nuk ka prekur vetëm Shqipërinë, por të gjithë Europën.
Për këtë, ai bëri të ditur edhe faturën e tij të dritave në Spanjë. Në një konferencë për mediat me kryeministrin Edi Rama, ai shtoi se Rusia po e përdor varësinë e Europës nga gazi si armë.
“Po paguaja faturën e energjisë në Spanjë, nga 50 euro, tani ka shkuar 500 euro. Dhe kjo ka ndodhur në të gjithë Europën. Nafta është më shumë se 2 euro litri, duke u rritur me 20%. E di që keni hasur shqetësime mjaft të mëdha. Në mendjen e të gjithë qytetarëve është rritja e çmimeve, jo vetëm në Shqipëri. Nuk janë pasojat e sanksioneve, sepse nuk ka pasur të bëjë fare me sanksionet. Por është një proces që ka nisur me rritjen e çmimeve të naftës dhe gazit, që është pasojë e varësisë që të gjithë kemi ndaj Rusisë dhe tashmë Rusia po e përdor si luftë”,-tha Borrell./Opinion.al
