Bashkimi Europian është partneri kryesorë tregtarë i Shqipërisë. Me zhvillimin teknologjik dhe rritjen e globalizmit, tregtia e shërbimeve zgjerohet. Eurostat ka publikuar të dhënat mbi shkëmbimet tregtare të shërbimeve.
Sipas të dhënave të Eurostat, Shqipëria pati sufiçit në tregtinë e shërbimeve me BE. Për të dytin vit radhazi eksportet e shërbimeve shqiptare tejkaluan importet e shërbimeve, me diferencë 77.4 milionë euro. Eksportet e shërbimeve nga Shqipëria në BE ishin 857.9 milionë euro, nga 812.7 milionë euro një vit më parë, duke u rritur me 6%. Suficiti tregtar i Shqipërisë në shërbime njohu zgjerim me gati 60%.
Në kategorinë e shërbimeve përfshihen: shërbimet e mirëmbajtjes dhe riparimit; transporti; udhëtimi; ndërtimi; sigurimi dhe shërbime pensionale; shërbimet financiare; përdorimi i pronës intelektuale; shërbimet në telekomunikacion dhe informatikë; shërbime të tjera të biznesit; shërbimet argëtuese; shërbimet qeveritare; etj.
Nga vendet e Ballkanit Perëndimor, vetëm Shqipëria dhe Mali i Zi eksportuan më shumë se sa importuan. Sufiçiti tregtar i Malit të Zi me BE-në në lidhje me shërbimet ishte 121 milionë euro, ndjekur nga Shqipëria me suficit prej 77.4 milionë euro. Nga vendet e rajonit, Serbia njohu deficitin më të gjerë në shërbime, me diferencë 563.2 milionë euro, ndjekur nga Maqedonia e Veriut me 438.2 milionë euro dhe Bosnja me 94 milionë euro.
Për Kosovën nuk janë përditësuar të dhëna mbi tregtinë e shërbimeve me BE-në. /Opinion.al
